Útkall Rauður – Esja

Elva Tryggvadóttir skrifaði þann 13. maí 2012 10:45

Rúmlega eitt í dag fékk sveitin boð um að senda undanfara og fjórhjól til aðstoðar einstakling við Esjuna. Stuttu síðar fóru fjórir undanfarar ásamt tveimur bílstjórum á tveimur bílum úr húsi. Tveir úr útkallsstjórn voru í húsi ásamt tveimur tilbúnum björgunarmönnum.

Hreinsunarátak Garðabæjar

Elvar Jónsson skrifaði þann 08. maí 2012 18:28

Félagar í Hjálparsveit skáta Garðabæ tóku heldur betur þátt í hreinsunarátaki bæjarins. Hluti sveitarinnar hreinsaði allt rusl í móanum norðan Arnarnesvegar og annar hluti hreinsaði í kringum heimkynni sveitarinnar, Jötunheima. Að lokum var slegið upp grillveislu með nágrönnum okkar í Vífli

Styrkur frá Isavia

Elvar Jónsson skrifaði þann 07. maí 2012 20:42

Styrktarsjóður Isavia úthlutaði styrkjum til björgunarsveita á formannafundi Landsbjargar um síðustu helgi. Hjálparsveit skáta Garðabæ var ein þeirra sveita sem hlaut styrk og mun hann koma sér vel í öflugt starf sveitarinnar

Útkall - neyðarblys á lofti

Elvar Jónsson skrifaði þann 21. apríl 2012 05:46

Sveitin var kölluð út í gærkvöldi vegna neyðarblyss sem hafði sést á lofti utan Straumsvíkur. Bátahópur og leitarhópar frá sveitinni fóru til leitar og leituðu til klukkan 3 í nótt, en þá var leit hætt þar sem talið var fullvíst að blysinu hefði verið skotið frá landi

Útkall - F2 gulur

Andri Guðmundsson skrifaði þann 20. apríl 2012 10:09

Heildarútkall á svæði 1 - leit í Esju. Upp úr klukkan fimm í gær barst björgunarsveitum Slysavarnarfélagsins Landsbjargar á höfuðborgarsvæðinu tilkynning um mann í sjálfheldu í Esjunni. Fjölmennt lið björgunarsveitarmanna var kallað til leitar en viðkomandi gat ekki gefið upp nákvæma staðsetningu. Um 100 björgunarsveitarmenn fóru til leitar en aðstæður voru góðar og var viðkomandi í símasambandi. Maðurinn fannst nálægt klifursvæði í Kistufelli. Alls tóku 21 félagar HSG þátt í aðgerðinni ásamt einum hundi, á þremur bílum og einu fjórhjóli.

Útkall - F2 Gulur

Andri Guðmundsson skrifaði þann 20. apríl 2012 10:02

Á þriðja tímanum í gær barst tilkynning um svifdrekaslys í klettum sunnan Hveragerðis. Tveir félagar frá HSG fóru með þyrlu Landhelgisgæslunnar austur því svæðið sem svifdrekinn hafði endað á var afar erfitt yfirferðar. Vel gekk að koma konunni niður miðað við aðstæður.