Lög Hjálparsveitar skáta Garðabæ
Garðabæ 6. október 2026
1. Kafli – Sveitin og tilgangur hennar
1. gr. Heiti, heimili, merki og aðild
Sveitin heitir Hjálparsveit skáta í Garðabæ, skammstafað HSG. Heimili hennar og varnarþing er í Garðabæ.
Merki sveitarinnar er hringur og inn í honum jafnarma kross ásamt nafni sveitarinnar. Merkið er grænt á appelsínugulum fleti.
Sveitin er aðili að Slysavarnafélaginu Landsbjörg og hefur samstarf við skátafélagið Vífil í Garðabæ.
2. gr. Tilgangur og fjármögnun
Tilgangur sveitarinnar er að bjarga mannslífum og verðmætum þegar hætta steðjar að. Sveitin vinnur að tilgangi sínum með björgunar-, leitar- og hjálparstarfsemi, þjálfun félaga og öflun nauðsynlegs búnaðar.
Sveitin starfar samkvæmt lögum nr. 43/2003 um björgunarsveitir og björgunarsveitarmenn og nr. 110/2021 um félög til almannaheilla.
Starfið er fjármagnað með fjáröflun, styrkjum, framlögum, félagsgjöldum og öðrum tekjum sem samrýmast tilgangi sveitarinnar. Fjármunum skal eingöngu ráðstafað í samræmi við tilgang hennar.
2. Kafli. – Félagsaðild
3. gr. Aðild og nýliðaþjálfun
Aðild er heimil einstaklingi sem er á 18. aldursári og hefur fengið inngöngu í nýliðaþjálfun sveitarinnar. Umsókn skal vera skrifleg og stjórn tekur ákvörðun um aðild. Nýliði öðlast félagsaðild, að undangenginni undirritun trúnaðaryfirlýsingu, þegar hann er skráður í félagatal.
Nýliði skal ljúka nýliðaþjálfun innan frests sem ákveðinn er í reglugerð. Þar skal einnig kveðið á um hlé og framlengingu frests. Ljúki nýliði ekki þjálfun innan frests og hafi honum ekki verið veitt framlenging getur stjórn ákveðið að vísa honum úr sveitinni samkvæmt 5. gr.
Stjórn getur veitt undanþágu frá nýliðaþjálfun að hluta eða öllu leyti. Áður en einstaklingur undirritar eiðstaf sveitarinnar skal hann ljúka þeirri fræðslu og þjálfun sem stjórn telur nauðsynlega.
4. gr. Réttindi og skyldur félaga
Félagi sem ekki hefur undirritað eiðstaf sveitarinnar telst nýliði. Nýliði hefur seturétt og málfrelsi á félagsfundum en hvorki atkvæðisrétt né kjörgengi.
Við undirritun eiðstafs sveitarinnar öðlast félagi atkvæðisrétt á félagsfundum og kjörgengi til stjórnar og annarra trúnaðarstarfa innan sveitarinnar.
Félögum ber að greiða félagsgjald, sé það ákveðið af aðalfundi, og virða lög og reglugerðir HSG, lög og siðareglur Slysavarnafélagsins Landsbjargar, reglur og áætlanir sveitarinnar.
5. gr. Lok félagsaðildar og viðurlög
Félagsaðild lýkur með úrsögn eða brottvísun. Félagi segir sig úr sveitinni með því að tilkynna úrsögn skriflega til stjórnar. Við lok félagsaðildar á félagi ekki tilkall til sjóða eða eigna sveitarinnar.
Stjórn getur veitt félaga skriflega áminningu, svipt hann félagsréttindum tímabundið eða vísað honum úr sveitinni ef hann brýtur gegn skyldum sínum samkvæmt 4. gr. eða uppfyllir ekki lengur skilyrði félagsaðildar samkvæmt 3. gr.
Viðurlög skulu vera í samræmi við alvarleika máls. Tímabundin réttindasvipting skal ákveðin til tiltekins tíma, þó aldrei lengur en 6 mánuði. Að þeim tíma liðnum öðlast félagi réttindi sín að nýju nema önnur ákvörðun hafi verið tekin samkvæmt greininni.
Um málsmeðferð við brottvísun fer samkvæmt ákvæði laga nr. 110/2021 um félög til almannaheilla. Sama málsmeðferð skal gilda, eftir því sem við á, um tímabundna réttindasviptingu.
3. kafli – Stjórn og starfshættir
6. gr. Félagsfundir
Aðalfundur skal haldinn í október ár hvert. Stjórn er heimilt, með samþykki sveitarfundar, að fresta honum ef sérstaklega stendur á, þó ekki seinna en til og með 15. nóvember.
Sveitarfundir skulu haldnir eftir þörfum, þó eigi sjaldnar en á þriggja mánaða fresti. Stjórn getur auk þess boðað til aukaaðalfundar og annarra félagsfunda. Stjórn skal boða til fundar að kröfu 25 atkvæðisbærra félaga nema lög nr. 110/2021 um félög til almannaheilla mæli fyrir um að færri félaga þurfi til.
Til félagsfunda skal boða skriflega með rafrænum hætti með minnst þriggja daga fyrirvara og skal fundarefnis getið í fundarboði. Um þátttöku- og atkvæðisrétt fer samkvæmt 4. gr. Um kosningar á félagsfundum fer samkvæmt 15. gr. laga nr. 110/2021 um félög til almannaheilla, nema annað sé ákveðið í lögum þessum.
Á aðalfundi skulu eftirfarandi mál vera á dagskrá:
Skýrsla stjórnar.
Reikningar sveitarinnar fyrir liðið starfsár.
Skýrslur fastanefnda og flokka.
Lagabreytingar.
Kosning stjórnar og fastanefnda.
Ákvörðun félagsgjalds.
Önnur mál.
Fundargerð skal haldin um aðalfundi, aukaaðalfundi, sveitarfundi, sveitarráðsfundi og stjórnarfundi. Ritari stjórnar varðveitir fundargerðir og gerir þær aðgengilegar félögum. Um staðfestingu fundargerða félagsfunda og aðra málsmeðferð þeirra fer samkvæmt lögum nr. 110/2021 um félög til almannaheilla.
7. gr. Stjórn og skipulag
Stjórn sveitarinnar skipa fimm félagar: formaður, varaformaður, ritari, gjaldkeri og einn meðstjórnandi. Tveir varamenn skulu jafnframt kosnir og í hvaða röð þeir skulu taka sæti.
Stjórnarmenn og varamenn eru kosnir á aðalfundi til eins árs. Formaður ritar firma og skuldbindingar sveitarinnar. Allar meiriháttar ráðstafanir skulu bornar undir félagsfund.
Stjórn fer með málefni sveitarinnar milli félagsfunda samkvæmt ákvörðunum félagsfunda og lögum nr. 110/2021 um félög til almannaheilla.
Sveitinni skal skipt í flokka. Nánar skal kveðið á um flokka, nefndir og skipulag starfseminnar að öðru leyti í reglugerðum sveitarinnar.
8. gr. Reikningsár og skoðun ársreiknings
Reikningsár sveitarinnar er frá 1. september til 31. ágúst. Aðalfundur samþykkir ársreikning sveitarinnar.
Aðalfundur kýs einn skoðunarmann reikninga og einn varamann hans til eins árs.
9. gr. Reglugerðir, reglur og áætlanir
Stjórn semur reglugerðir um nýliðaþjálfun, útköll, flokka, nefndir og ráð og um aðra einstaka þætti starfseminnar. Reglugerðir öðlast gildi við samþykki félagsfundar og skal tillögu um setningu þeirra eða breytingu getið í fundarboði.
Stjórn getur sett reglur og áætlanir innan ramma laga, reglugerða og ákvarðana félagsfunda.
Gildandi reglugerðir, reglur og áætlanir skulu vera félögum aðgengilegar.
4. Kafli – Breytingar og slit
10. gr. Lagabreytingar
Lögum þessum verður aðeins breytt á aðalfundi og skal tillögu til breytinga geta í fundarboði. Minnst þrjá fjórðu hluta greiddra atkvæða þarf til breytinga. Um samþykki breytinga og gildistöku þeirra fer samkvæmt 14. og 32. gr. laga nr. 110/2021 um félög til almannaheilla.
11. gr. Tímabundin niðurlagning og slit
Leggist starfsemi sveitarinnar tímabundið niður skulu eignir hennar vera í vörslu Skátafélagsins Vífils eða, ef það er ekki unnt, Garðabæjar í allt að tíu mánuði með það að markmiði að starfsemin verði endurvakin.
Verði sveitinni slitið skulu eftirstandandi eignir renna til Slysavarnafélagsins Landsbjargar og nýttar til sambærilegs almannaheillastarfs. Um slit fer að öðru leyti samkvæmt lögum nr. 110/2021 um félög til almannaheilla.
12. gr. Gildistaka
Lög þessi öðlast gildi þann sjötta október 2026.
Ákvæði til bráðabirgða
Við gildistöku laga þessara halda gildandi reglugerðir, reglur, áætlanir og leiðbeiningar HSG gildi sínu að því marki sem þær fara ekki gegn lögum þessum eða lögum nr. 110/2021 um félög til almannaheilla, þar til þeim er breytt eða þær felldar niður.