Lög Hjálparsveitar skáta Garðabæ
Garðabæ 7. október 2025
1. Kafli
1. gr.
Sveitin heitir Hjálparsveit skáta í Garðabæ, skammstafað HSG
Sveitin hefur með sér samstarf við skátafélagið Vífil í Garðabæ.
2. gr.
Heimili sveitarinnar og varnarþing er í Garðabæ
3. gr.
Tilgangur sveitarinnar er: Að stunda almenna björgunar-, leitar- og hjálparstarfsemi, þegar verðmæti eða mannslíf eru í hættu, að halda uppi námskeiðum og æfingum fyrir félaga sína, svo þeir verði jafnan færir um að rækja markmið sveitarinnar og að afla þess búnaðar sem nauðsynlegur er til starfsins.
Sveitin starfar samkvæmt lögum nr. 110/2021 um félög til almannaheilla.
4. gr.
Merki sveitarinnar er hringur og inn í honum jafnarma kross ásamt nafni sveitarinnar. Merkið er grænt á appelsínugulum fleti.
2. Kafli.
5. gr.
Félagar geta þeir einir orðið sem uppfylla þessi skilyrði:
a) Eru fullra 18 ára.
b) Hafa starfað með sveitinni í 18 mánuði.
c) Uppfylla skilyrði samkvæmt reglugerð um nýliðaþjálfun.
Undanþágur:
Stjórn sveitarinnar er heimilt að veita einstaklingi undanþágu frá skilyrðum b og c-liðar. Þessari undanþágu skal aðeins beitt ef sá hinn sami hefur yfir að ráða einhverri sérþekkingu sem nýst getur sveitinni eða hann kemur frá annarri björgunarsveit innan Slysavarnarfélagsins Landsbjargar. Hann skal fá nauðsynlega kennslu og þjálfun sem stjórn telur þurfa til að vera fullgildur félagi HSG og að því loknu undirrita eiðstaf HSG.
Virkir félagar:
Til að vera virkur félagi í HSG þarf að vera fullgildur félagi í sveitinni og vera á útkallsskrá sveitarinnar. Virkir félagar hafa kjörgengi og atkvæðisrétt á sveitar- og aðalfundum. Virkir félagar eiga rétt á þeim styrkjum sem bjóðast hverju sinni frá sveitinni hvort sem um er að ræða námskeið, búnað eða annað. Útkallsnefnd heldur utan um útkallsskrá sveitarinnar.
Varamenn:
Ef fullgildur félagi dettur út af útkallsskrá sveitarinnar telst hann sjálfkrafa varamaður. Varamenn teljast ekki virkir félagar og eiga því ekki rétt á fjárframlögum frá sveitinni, hvort sem um er að ræða námskeið, búnað eða annað sem virkir félagar njóta Varamaður hefur seturétt á sveitar- og aðalfundum.
Til þess að verða fullgildur félagi á nýjan leik þarf félagi að komast aftur inná útkallsskrá sveitarinnar í samráði við stjórn og útkallsnefnd.
6. gr.
Við inngöngu í sveitina skal hver félagi undirrita eiðstaf HSG
7. gr.
Inntökubeiðnir og úrsagnir úr sveitinni skulu vera skriflegar og sendar stjórn sveitarinnar. Við brottför úr sveitinni getur félagi ekki gert tilkall til sjóða eða eigna sveitarinnar.
8. gr.
Stjórn getur vikið félaga úr sveitinni, tímabundið eða fyrir fullt og allt, fyrir þessar sakir:
a) Ef hann brýtur gegn siðareglum Slysavarnarfélagsins Landsbjargar.
b) Ef hann verður uppvís að því að spilla áliti sveitarinnar eða vekja tortryggni hjá félögum hennar.
c) Ef hann hefur neytt áfengis eða ávana- og fíkniefna í starfi sveitarinnar.
d) Ef hann verður uppvís að óviðunandi umgengni um eigur og tæki sveitarinnar.
e) Ef hann brýtur eiðstaf sveitarinnar.
f) Ef hann sýnir sveitinni ítrekuð vanskil.
g) Ef stjórn hefur veitt honum formlega áminningu og félagi hefur ekki bætt ráð sitt í samræmi við efni áminningar.
Stjórn getur veitt félaga formlega áminningu ef brot í starfi sveitar er ekki það alvarlegt að það varði brottrekstri. Áminning skal vera skrifleg.
Ákvörðun um brottvikningu eða áminningu skal taka mið af alvarleika atviks/háttsemi. Áður en stjórn tekur ákvörðun um brottrekstur eða áminningu skal hún veita félaga kost á að tala máli sínu,, þ.m.t. að leggja fram athugasemdir sínar skriflega. Ákvörðun um brottrekstur (tímabundinn eða varanlegan) eða áminningu skal vera rökstudd og veitt skriflega.
Sætti hlutaðeigandi sig ekki við ákvörðun stjórnar getur hann skotið máli sínu til næsta sveitarfundar. Vilji félagi leggja ákvörðun stjórnar fyrir sveitarfund skal þess getið í dagskrá sveitarfundar. Skrifleg ákvörðun stjórnar skal þá kynnt á sveitarfundinum og viðkomandi gefinn kostur á að útskýra afstöðu sína til ákvörðunarinnar. Að loknum umræðum um málið getur félagi óskað eftir að ákvörðun stjórnar verði borin undir fundinn til endanlegrar ákvörðunar. Afl atkvæða ræður úrslitum á sveitarfundi. Atkvæðagreiðsla skal vera skrifleg.
3. Kafli
9. gr.
Sveitinni skal skipt niður í flokka. Sveitin getur sett reglugerðir um flokkaskiptingu og einstaka þætti starfseminnar.
10. gr.
Æðsta vald í málefnum sveitarinnar er í höndum aðalfundar. Aðalfundur skal haldinn í október ár hvert. Stjórn sveitarinnar er heimilt með samþykki sveitarfundar að fresta aðalfundi fram til 15. nóvember ef sérstaklega stendur á. Atkvæðisrétt hafa allir fullgildir og virkir félagar sem eru skuldlausir við sveitina. Á aðalfundi skulu eftirfarandi mál vera á dagskrá:
Skýrsla stjórnar
Reikningar félagsins fyrir liðið starfsár.
Skýrslur fastanefnda og flokka
Lagabreytingar.
Kosning stjórnar og fastanefnda.
Ákvörðun félagsgjalds.
Önnur mál.
Skýrsla stjórnar, fastanefnda og flokka ásamt reikningum félagsins skulu liggja frammi á fundinum.
11. gr.
Sveitarfundir skulu haldnir eigi sjaldnar en á þriggja mánaða fresti. Þó getur stjórn sveitarinnar boðað til fundar þegar henni þykir þess þörf. Ennfremur er stjórninni skylt að boða til sveitarfundar ef a.m.k fjórðungur virkra félaga óska þess skriflega og greinir fundarefni. Nú hefur stjórn sveitarinnar ekki boðað til fundar innan 14 daga eftir að henni barst krafan og geta þá hlutaðeigandi félagar sjálfir hvatt til fundar. Rétt til setu á fundum hafa fullgildir félagar og varamenn.
Stjórn getur boðað til auka aðalfundar ef hún telur það nauðsynlegt. Stjórn skal boða til aukaaðalfundar ef a.m.k. þriðjungur virkra félaga fara fram á auka aðalfund og setja á dagskrá þau mál sem tilgreind eru. Um fundarboðun, þátttökurétt, atkvæðisrétt, afgreiðslu mála o.þ.h. gilda sömu reglur og um aðalfund.
12. gr.
Fundir eru lögmætir ef réttilega er til þeirra boðað. Ef fundur hefur ekki verið löglega boðaður skal boða til nýs fundar innan viku.
Til allra funda skal boða með minnst 3ja daga fyrirvara skriflega með rafrænum hætti.
Einfaldur meirihluti atkvæða ræður málsúrslitum á fundi nema öðru vísi sé mælt fyrir um í lögum þessum.
Fundargerð skal haldin um aðal-, sveitar-, sveitarráðs og stjórnarfundi. Ritari stjórnar skal staðfesta fundargerðina og birta á lokuðu vefsvæði sveitarinnar. Ritari stjórnar varðveitir fundargerðir
13. gr.
Stjórn sveitarinnar skal skipuð 5 félögum: Formanni, varaformanni, ritara, gjaldkera og einum meðstjórnanda. Skulu þeir kosnir á aðalfundi og einnig 2 menn til vara.
Fastanefndir sveitarinnar skulu vera: Birgðanefnd, skemmtinefnd, fjáröflunarnefnd, uppstillingarnefnd, útkallsnefnd og laganefnd. Nefndir skulu starfa samkvæmt reglugerð.
Stjórnar- og nefndarmenn skulu kosnir skriflega ef fleiri eru í kjöri samkvæmt tilnefningu en á að kjósa. Kjörtími stjórnar er 1 ár. Til að hljóta kosningu þarf meirihluta greiddra atkvæða.
Formaður boðar til stjórnarfunda. Stjórnarfundur er lögmætur ef minnst 3 stjórnarmenn eru mættir. Úrslitum ræður afl atkvæða, en séu þau jöfn ræður atkvæði formanns.
Stjórnin boðar til sveitarfundar og undirbýr málefni, framkvæmir fundarályktanir og annast störf milli funda. Stjórnin leggur fyrir aðalfund til samþykktar reikninga sveitarinnar fyrir liðið starfsár.
Stjórnin hefur eftirlit með öllum framkvæmdum sveitarinnar og annast eftirlit með eignum hennar, ákveður framkvæmdir, annast um gerð rekstraráætlunar, sér um greiðslu útgjalda og hefur á hendi önnur þau störf sem henni er falin samkvæmt samþykkt aðalfundar eða sveitarfunda. Stjórnin gætir hagsmuna sveitarinnar og getur nýtt þau réttarúrræði sem lög bjóða til að verja hagsmuni sveitarinnar.
Innan sveitarinnar starfar sveitarráð. Sveitarráð skal skipað fulltrúum stjórnar og allra starfandi flokka sveitarinnar á hverjum tíma. Hlutverk sveitarráðs er að vera samráðsvettvangur stjórnar og flokka. Ráðið skal vera stjórninni til ráðgjafar um ýmis málefni sem tengjast starfi sveitarinnar s.s. þjálfunarmál, búnaðarkaup, húsnæðismál o.fl. Sveitarráð hefur frumkvæði að gerð tillögu að dagskrá sveitarinnar fyrir komandi starfsár. Sveitarráð heldur fundi eftir þörfum en að lágmarki skal haldinn einn fundur fyrir upphaf starfsárs til gera tillögu að dagskrá sveitarinnar.
14. gr.
Skuldbindingar sem stjórn gerir fyrir hönd sveitarinnar eru bindandi fyrir hana. Samþykki meirihluta stjórnar þarf til að skuldbinda sveitina. Til að veðsetja eignir sveitarinnar þarf samþykki 2/3 hluta aðalfundar eða sveitarfundar. Stjórnin ber ábyrgð gjörða sinna.
15. gr.
Hver aðalfundur kýs tvo skoðunarmenn reikninga og einn til vara. Skulu þeir vera félagar sveitarinnar. Kjörtími þeirra er eitt ár. Stjórn sveitarinnar er heimilt að fela löggiltum endurskoðanda endurskoðun ásamt hinum kjörnu skoðunarmönnum. Ársreikningur skal vera áritaður af endurskoðendum eða skoðunarmönnum sveitarinnar. Reikningsár sveitarinnar er frá 1. september til 31. ágúst ár hvert.
16. gr.
Sjóði sveitarinnar skal ávaxta í íslenskum banka á sem öruggastan hátt. Ef starfssemi HSG leggst niður skulu eignir og tæki sveitarinnar vera í vörslu skátafélagsins Vífils eða að öðrum kosti bæjarstjórnar Garðabæjar, fyrstu 10 mánuðina. Ef engar tilraunir hafa verið gerðar til að endurvekja sveitina að þeim tíma liðnum skal lúta lögum Slysavarnarfélagsins Landsbjargar.
4. Kafli
Ýmis ákvæði.
17. gr.
Sveitin er aðili að Slysavarnarfélaginu Landsbjörg og lýtur lögum og samþykktum þess eftir því sem við á. Sveitin skal jafnan kappkosta að hafa samstarf við yfirvöld, stjórn Almannavarna og aðra björgunaraðila í landinu og sýna tillitsemi og drengskap í starfi sínu.
Félögum HSG ber að virða siðareglur Slysavarnafélagsins Landsbjargar, lög HSG, reglugerðir, áætlanir og leiðbeiningar sem sveitin hefur sett.
18. gr.
Lögum þessum verður aðeins breytt á aðalfundi. Tillögur til breytinga á lögum sveitarinnar skulu koma fram í fundarboði eða auglýsingu aðalfundar og þurfa samþykki minnst 2/3 hluta fundarmanna til að öðlast gildi. Tillögur sem ekki koma fram í fundarboði eða auglýsingu aðalfundar þurfa samþykki minnst 4/5 hluta fundarmanna.
19. gr.
Stjórn semur reglugerðir, áætlanir og reglur um einstaka þætti í starfsemi sveitarinnar. Reglugerðir þurfa samþykki einfalds meirihluta á aðalfundi eða samþykki 2/3 hluta fundarmanna á sveitarfundi til að öðlast gildi. Kynna skal breytingar á reglugerð og setningu nýrrar reglugerðar í boðun fundarins. Gildandi reglugerðir skulu vera félögum aðgengilegar.